كسكس البلبولة بالخضر

فالكوكوط درت اللحم مع الما ثم ضفت العطرية :ابزار و سكين بزايد ثم شوية الملح و الزعفران



ثم ضفت الزيت مخلطة و البصلة مقطعة غليظة



ثم الحمص فازك و مغسول



و نخلي كلشي يغلي و يتشرب ثم نضيف الما الكافي و نخليه يطيب



ثم وجدت الخضرة الي عندي





درت الخضر فالبرمة و ضفت عليها شوية الابزار و ملي طاب اللحم و الحمص خديت المرق ضفتو للخضر و اللحم خليتو على جنب



خليت الخضر غلات شوية ثم ضفت مطيشة مقطعة و ستفت المكو الي غليتو فالما من قبل شي 3 دقايق





ثم درت قبيطة ديال القسبور



دابة غادي ندوز نوجد البلبولة







انا درت البلبولة الغليظة و الرقيقة مخلطين ضفت ليهم شوية ديال الزيت و رشيتهوم رشة خفيفة باش البلبولة متخرجش من عيون الكسكاس



درتها فالكسكاس و غطيتها تتبخر 10 دقايق





و من بعد 10 دقايق خديت غراف كبير فيه تقريبا لتر و نصف ديال الما و كبيتو فوق البلبولة و هي فالكسكاس وخليتها تتبخر 15 دقيقة اخرى



هنا من بعد ما دازت 15 دقيقة تنفخات تبارك الله





حيدتها و عاود رشيتها الرشة 2 و رديتها تتبخر 10 دقايق



ثم رشيتها الرشة التالثة و خليتها تتبخر 15 دقيقة اخرى و هاهي وجدات





درت تفريشة ديال البلبولة فغطار الطاوس ثم درت اللحم و الخضر و هاهواواجد